Як сабаби тағйирёбии босуръати қурби нақдӣ- ин бад шудани вазъи геосиёсии ҷаҳон мебошад

Душанбе, 4.12.2015. (АМИТ «Ховар»).- Роҳбарияти  Бонки миллии Тоҷикистон зимни нишасти матбуотӣ омилҳои асосиеро, ки сабаби тағйирёбии босуръати қурби нақдӣ дар рӯзҳои охир шудаанд, номбар намуданд. 
Аз ҷумла,  раванди пурқувват шудани доллари амрикоӣ вобаста ба интизориҳо аз баланд шудани фоизи қарздиҳии Бонки марказии ИМА (ФРС) (эҳтимолан дар миёнаи моҳи декабр), бад шудани вазъи геосиёсии ҷаҳон, бинобар воқеаҳои Сурия ва Туркия, пастравӣ ва ноустувории нархи нафт ва вобаста ба ин тағйирёбии аз эътидол беруни қурби асъори миллии шарики асосии тиҷоратии мо (Федератсияи Русия),  омили мавсимӣ ва вобаста ба он кам шудани вориди асъори хориҷӣ ба ҷумҳурӣ, пеш аз ҳама аз ҳисоби кам шудани воридоти интиқоли пулии шахсони воқеӣ ва зиёд шудани талабот ба асъори нақди хориҷӣ, омилҳои равонӣ вобаста ба интизориҳои бад шудани вазъияти ҷаҳон, минтақа ва тағйирёбиҳои минбаъдаи қурб ва вобаста ба ин кам шудани пешниҳоди фурӯши доллари нақди амрикоӣ ва зиёд шудани талабот ба хариди он аз ҷониби аҳолӣ сабаби ин вазъ гашта буд. 
“Омили ҳаннотӣ аз ҷониби кормандони нуқтаҳои мубодилаи асъор ва кӯшишҳои нигоҳ доштани даромади калони қаблан вуҷуддошта аз фарқияти қурбҳо дар бозори ғайрирасмии хариду фурӯши доллари нақдии ИМА, муносибат ва рафтори худи шахсони воқеӣ — фурӯшанда ва харидорони асъори хориҷӣ, аз ҷумла ба овозаю хабарҳои беасосу бардурӯғ бовар намудани шахсони воқеӣ ва саросемавор ба ҳар гуна қурби аз ҷониби ҳаннотони беинсоф пешниҳодшуда мубодила  кардани маблағҳои пулиашон, ки дар ниҳоят зарар мебинанд, низ сабаби тағйирёбии қурби асъор гаштааст”,-гуфт Ҷ. Нуралиев.