А. Ғоиб: «Ҳам воридот ва ҳам содирот дар соли 2015 коҳиш ёфтааст»

Душанбе, 25.01.2016.(АМИТ «Ховар»).- Ҷумҳурии Тоҷикистон дар давоми соли сипаригардидаи 2015 бо сад кишвари ҷаҳон муомилоти тиҷоратӣ дошт». Ин матлабро Абдуфаттоҳи Ғоиб -сардори Хадамоти гумруки кишвар 25 январ дар ҷамъи хабарнигорони ватанию хориҷӣ зимни нишасти матбуотӣ зикр кард. Роҳбари Хадамоти гумруки кишвар афзуд, ки ҳаҷми умумии гардиши тиҷорати хориҷии ҷумҳурӣ дар давраи ҳисоботӣ 4326,0 миллион доллари амрикоиро ташкил дод, ки ин нишондод нисбат ба ҳамин давраи соли гузашта 943,0 миллион доллар ё 17,9 % кам буда, воридот 3435,0 миллион доллар ва содирот 891,0 миллион долларро ташкил медиҳад. Нисбат ба соли 2014 воридот ба маблағи 863, 0 миллион доллар ва содирот ба қадри 79,0 миллион доллар коҳиш ёфтааст.
Абдуфаттоҳи Ғоиб зикр кард, ки аз ҳаҷми умумии воридот дар соли сипаригардида ҳиссаи бештарро маҳсулоти нафтӣ — 10,2% ё ин ки 351,6 миллион доллар, гандум 7,1% ё 244,5 миллион доллар, гази моеъ 4,3 % ё 147,0 миллион доллар, оксиди алюминӣ ( глинозем) 3,9 % ё 133,8 миллион доллар, чӯбу тахта 3,8 % ё 129,9 миллион доллар ва воситаҳои нақлиёти сабукрав 2,6 % ё ин ки 88,2 миллион долларро ташкил медиҳанд.