Афзоиши майдонҳои боғоти нав аз ҳисоби заминҳои бекорхобида

Хуҷанд, 04.01.2016. (АМИТ “Ховар”).- Тавре ки ба АМИТ “Ховар” аз Раёсати кишоварзии вилояти Суғд иттилоъ доданд, соли гузашта мувофиқи нақша дар вилоят дар масоҳати 1397 гектар боғу токзори нав бунёд гардид, ки зиёда аз 100 гектари он боғҳои нави интенсивӣ буда, дар онҳо асосан ниҳолҳои зардолу, олу, шафтолу ва бодом шинонида шуданд.
Боғҳои интенсивии бунёдёбанда асосан ба бунёди боғоти сиёҳолу равона шуда, дар заминҳои бекорхобидаи мавзеъҳои ҷамоати деҳоти Чашмасори ноҳияи Бобоҷон Ғафуров ва ноҳияи Мастчоҳ, мавзеи шаҳраки навбунёди Меҳрободи собиқ хоҷагии У. Хайём бунёди боғот ба нақша гирифта шуда, корҳо асосан ба воситаи таҷҳизоти обёрии каммасрафи қатрагӣ ба роҳ монда шудаанд.
Ҳамчунин мутобиқ ба маълумоти манбаъ, дар доираи андешидани тадбирҳои судманд барои рушди соҳа дар соли 2015 то 1 декабр дар ҳамаи шаклҳои хоҷагидории вилоят ба маблағи 5085,3 млн. сомонӣ маҳсулоти кишоварзӣ истеҳсол шуд, ки он нисбат ба ҳамин давраи соли 2014 — 102,5%-ро ташкил дода, аз ҷумла истеҳсоли намудҳои ғаллагиҳо ба 68 035 тонна, сабзавот 66 434,8 тонна, картошка 24 382 тонна, полезиҳо 30 353 тонна, гўшт 2909 тонна, шир 6 796,7 тонна, тухм 14 798,7 ҳазор дона ва асал 32,3 тонна зиёд таъмин гардид.