Дар «Пажӯҳишгоҳи гастроэнтерологияи ҶТ» дастгоҳи даруннигарии капсулӣ насб гардид

Душанбе, 13.01.2016. (АМИТ «Ховар»). — Бо мақсади баланд бардоштани сатҳи хизматрасонии тиббӣ барои таъмини муассисаҳои тиббӣ бо таҷҳизоту лавозимоти тиббӣ, дар доираи ҳамкорӣ бо шарикон ба Муассисаи давлатии «Маркази миллии тиббии Ҷумҳурии Тоҷикистон» таҷҳизоти зарурии тиббӣ, аз ҷумла ташхиси фаросавтӣ, рентгени рақамии сайёр, сабти барқии кори дил ворид ва насб шуданд. Ин нуктаро имрӯз, 13 январ зимни нишасти матбуотӣ муовини авали вазири тандурустӣ ва ҳифзи иҷтимоии аҳолӣ Лола Бобоҳоҷиева ироа намуд.
Бино ба гуфтаи вазир дар Муассисаи давлатии «Пажӯҳишгоҳи гастроэнтерологияи Ҷумҳурии Тоҷикистон» дастгоҳи даруннигарии капсулӣ насб гардида, моҳи марти соли 2015 омӯзиши мутахассисон дар Ҷумҳурии Мардумии Чин дода шуд.
“Дар муассисаи мазкур усули дигари нодири ташхисию мониторингии раванди табобат — тести нафасии яккаратаи муайян кардани хеликобактер дар меъда ворид карда шуд”,-илова намуд Л. Бобоҳоҷиева.