Э. Раҳмон: Ба истифодаи техникаю таҷҳизоти каммасрафи барқӣ аҳамияти аввалиндараҷа бояд дод

Душанбе, 20.01.2016 (АМИТ «Ховар») .- «То ба имрӯз ҳаҷми неруи барқи дар кишвар истеҳсолшаванда барои таъмин намудани инкишофи устувори иқтисодиёт кифоят намекунад. Аз ин хотир моро лозим аст, ки дар баробари ба кор андохтани иқтидорҳои нави истеҳсоли неруи барқ, истифодаи самараноки онро дар ҳамаи соҳаҳо таъмин намуда, махсусан ба истифодаи техникаю таҷҳизоти каммасрафи барқӣ аҳамияти аввалиндараҷа диҳем»,-гуфт Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз, 20 январ дар Паёми худ ба Маҷлиси Олии Ҷумҳурии Тоҷикистон.
Сарвари кишвари тоҷикон илова намуд, ки соли 2016 нақша дорем дар ҳаҷми 300 мгВт иқтидорҳои иловагии энергетикиро ба истифода супорем. «Вале дар баробари ин мо дар давоми сол ба кор андохтани иқтидорҳои нави корхонаҳои саноатиро ба 350 мгВт мерасонем. Ҳаҷми истеҳсоли қудрати нав ва корхонаҳои саноатие, ки бунёд мекунем, басандагӣ намекунад. Мо бояд ҷойҳои нави корӣ таъсис диҳем ва иқтидори содиротии мамлакатро баланд бардорем»,- гуфт Пешвои миллат.
Ҳарчанд ки дар кишвари мо истихроҷи нафту газ ва коркарди маводи сӯзишворӣ хеле кам аст, захираҳои гидроэнергетикӣ ниҳоят бузурганд ва истифодаи оқилонаи онҳо метавонад имкониятҳои моро доир ба таъмин намудани рушди устувори иқтисодӣ ва тақвияти иқтидори содиротии кишвар ба маротиб афзун гардонад.