Эҳёи ҳунарҳои дастӣ дар манотиқи шаҳри Қурғонтеппа

Қурғонтеппа, 08.01.2016. (АМИТ «Ховар»). -Ташкилоти ҷамъиятии «Чашма» тасмим гирифтааст ба воситаи Иттифоқи ҳунармандони Тоҷикистон дар минтақаи Қурғонтеппа байни занҳои хонашин эҳёи хунарҳои дастиро ба роҳ монад.
Дар ин бора Санавбар Имомназарова, раиси раёсати ташкилоти ҷамъиятии «Чашма» дар ноҳияи Шаҳритус иттилоъ дод, ки имрӯз занҳо ба бофтани гилемҳои дастӣ машғуланд ва бо гузаронидани чандин машварат аз тарафи Иттифоқи ҳунармандони Тоҷикистон доир ба дизайн ва зинда кардани нақшу нигори мардумӣ якчанд намуд гилеми дастӣ омода гардида, ба фурӯш бароварда шудааст.
Ҳамчунин ба гуфтаи Санавбар Имомназарова таваҷҷуҳи харидорон ба ин гуна маҳсулот зиёд гардида, нархи гилемҳо аз 120 то 180 сомониро дар бар мегирад. Ҳоло Ташкилоти ҷамъиятии «Чашма» тавассути Фейсбук фармоишҳоро қабул намуда, маҳсулоти худро берун аз кишвар низ ба фурӯш бароварда истодааст.