Филми ҳунарии «Кин» ба саҳнаи синамо омад

Душанбе, 12.01.2015. (АМИТ «Ховар»).- Достони филми «Кин» аз рӯзгори як корманди бонк бо номи Фарҳод оғоз мегардад. Як гурӯҳ аз ҷинояткорон ӯро маҷбур месозанд, ки аз бонк ба онҳо пули зиёдатӣ диҳад. Дар ин миён писари Фарҳод бо номи Беҳрӯз ба хизмати ҳарбӣ меравад. Падараш оз ҷониби гурӯҳи ҷинояткорон бо туҳмати ногаҳонӣ зиндонӣ мегардад. Модараш ин дарду ғамро бардошт накарда, аз фироқи ҷудоиву танҳоӣ аз олам мегузарад. Баъд аз гузашти 2 сол Беҳрӯз аз хизмати ҳарбӣ баргашта, тасмим мегирад, ки қасоси падарашро аз душманон ситонад. Ӯ барои шикаст додани душманон бо ёрии дӯстонаш сирру асрори онҳоро омӯхта, акнун мехоҳад бегуноҳии падари хешро дар назди кормандони полис исбот намуда, бо ёрии онҳо мақсади худро амалӣ созад. Оё Беҳрӯз дар ин мубориза ғолиб мебарояд? Инро баъди тамошои филм маълум хоҳед кард.
Филми мазкур аз рӯйи филмнома ва коргардонии Саидмурод Одина бо продюсерии Музаффар Шодиев таҳия шудааст. Нақшҳои асосиро Музаффар Шодиев, Нодира Исоева, Шералӣ Абдулқайс, Моҳпайкар Ёрова ва дигарон иҷро намудаанд. Бисёр аз ҳунармандони филми ҳунарии «Кин» аз рӯйи достони филм нақши худро адо намудаанд, ки ин барои тамошобин хеле ҷолибу ҷозиб аст. Филми ҳунарии «Кин» соли 2015 дар мавзеъҳои зебоманзари Ҷумҳурии Тоҷикистон аз ҷониби гурӯҳи эчодии синамосози Музаффар Шодиев дар жанрҳои экшн, триллери-ҷангӣ ва тахайюли саргузаштӣ наворбардорӣ шудааст. Маблағи харҷшудаи филм то ҳол маълум нест. Ҳаҷми умумии филм 150 дақиқаро ташкил мекунад. Филми мазкур дар Тоҷикистон мавриди намоиши умум қарор гирифтааст.