Гумрук: Тиҷорати хориҷии Тоҷикистон соли 2015 17,9% коҳиш ёфтааст

Душанбе, 26.01.2016. (АМИТ «Ховар») -Соли 2015 маблағи умумии гардиши тиҷорати хориҷӣ 3 434,9 млн. доллар ба воридот ва 891,3 млн. доллар ба содирот рост меояд, ки нисбат ба ҳамин давраи соли 2014 воридот 863,1 млн. доллар, яъне 79,9% ва  содирот  79,4 млн. доллар кам гардида, 91,8%-ро ташкил додааст. Дар ин бора аз Хадамоти гумруки назди Ҳукумати ҶТ хабар доданд.

Дар содирот вазни қиёсии асосиро алюминии аввалия, нахи пахта, маъданҳо ва консентратҳо, маҳсулоти меваю сабзавот, пӯст ва дар воридот  мавқеи асосиро маҳсулоти нафтӣ, гази моеъ, оксиди алюминӣ (глинозем), чӯбу тахта, воситаҳои нақлиёти сабукрав, гандум, равғани растанӣ, шакар, орд, нуриҳои минералӣ ва семент ташкил медиҳанд.

Дар ин давра тиҷорат бо кишварҳои аъзои Иттиҳоди Давлатҳои Муштаракулманофеъ 2 045,1 млн. доллар ё 47,3% гардиши тиҷорати хориҷии Ҷумҳурии Тоҷикистонро ташкил дод, ки нисбат ба соли 2014 ба маблағи 380,7 млн. доллар ё 15,7% кам гардидааст. Аз ин маблағ 226,7 млн. доллар ба содирот ва 1 818,4 млн. доллар ба воридот мансуб аст.

Дар умум ҳаҷми асосии содироти мол ба давлатҳои Туркия 28,7%, Швейтсария 23,1%, Қазоқистон 16,4%, Эрон 6,7%, Русия 6,4%, Афғонистон 6,4%, ва Покистон 2,6% марбут мебошад.

Воридоти асосии мол ба мамлакатҳои Русия 30,5%, Чин 22,2%, Қазоқистон- 16,2%, Туркия 3,9%, Эрон 3,6%, Туркманистон 3,1%, Швейтсария 3,1%, Литва 2,4%, Покистон 1,2% ва Аморати Муттаҳидаи Араб 1,2% рост меояд.

Таҳлилҳо нишон медиҳанд, ки гардиши тиҷорати хориҷии Ҷумҳурии Тоҷикистон дар давоми соли 2015 нисбат ба  ҳамин давраи соли гузашта 17,9% коҳиш ёфтааст.