Хуҷанд: Бунёди макони истироҳатию фароғатӣ бахшида ба 25- солагии Истиқлолият

Душанбе, 13.01.2016. (АМИТ “Ховар”). — Бахшида ба 25- солагии Истиқлолияти давлатии Ҷумҳурии Тоҷикистон дар шаҳри Хуҷанд боз як макони истироҳатию фароғатӣ дар мавзеи «Панҷшанбе» -и шаҳри Хуҷанд бунёд мегардад.
Раиси шаҳр Раҷаббой Аҳмадзода аз лоиҳа ва нақшаи бунёди ин мавзеи фароғатӣ дидан намуд. Дар асоси нақшаи мазкур дар шафати ёдгории шаҳидони Ҷанги дуюми ҷаҳонӣ сохтмони фаввора бо гулгашту макони фароғатии сокинону меҳмонони шаҳр сохта хоҳад шуд.
Фаввораи навбунёд дар масоҳати 12 метри мураббаъ сохта шуда, баландии он ба 8 метр хоҳад расид. Лоиҳакашон пешниҳод намуданд, ки чароғакҳои фаввораи мазкур бо 7 ранги пурҷило оро дода шуда, дар атрофи он нишастгоҳи дамгирӣ, чароғҳои равшанидиҳанда насб шавад. Раиси шаҳри Хуҷанд дастур дод, ки ба гулзору сабзпӯш намудани ин мавзеъ ва навсозии роҳрави атрофи фаввора эътибори ҷиддӣ дода шавад.
Маблағгузории корҳои сохтмонию навсозӣ аз ҷониби Мақомоти иҷроияи ҳокимияти давлатии шаҳри Хуҷанд сурат гирифта, иҷрои корҳоро Идораи сохтмонии «Сохтмон-1» ба анҷом мерасонад.
Пешбинӣ мешавад, ки макони нави фароғатӣ дар арафаи таҷлили рӯзҳои Наврӯзи соли 2016 мавриди истифода қарор гирад.