Хуҷанд: Нахустин меҳмонхонаи панҷситорадор ва мактабҳои пешқадами инноватсионӣ бунёд мегардад

Душанбе, 22.01.2016. (АМИТ «Ховар») -Бо мақсади шиносоӣ бо ҷараёни корҳои сохтмонии иншооти дар шаҳр бунёдшаванда раиси шаҳри Хуҷанд Раҷаббой Аҳмадзода аз чанд мавзеи сохтмонӣ дидан намуд.
Раиси шаҳр нахуст бо корҳо дар иншооти сохтмонии бинои «Мактаби хусусии Пӯлотов», ки сохтмони он аз моҳи майи соли 2015 шуруъ шуда, барои 640 хонанда пешбинӣ ва бо маблағи 12 миллион сомонӣ бунёд мегардад, шинос шуд. Мактаб дорои синфхонаҳои барҳаво, ҳавзи шиноварӣ, китобхонаи электронӣ, майдончаи варзишӣ, ошхона бо 300 ҷойи нишаст, маркази ягонаи алоҳидаи гармидиҳӣ ва равшании худ аст ва он яке аз мактабҳои пешқадами инноватсионӣ хоҳад буд. Муассисон тасмим доранд, хонандагонро дар як рӯз ду маротиба бо хӯроки гарм таъмин намоянд. Дар шафати мактаби мазкур сохтмони боғчаи бачагона ва бунёди муассисаи таълимии олӣ низ ба нақша гирифта шуда, мувофиқи нақшаи дурнамои муассисон ташкили маҷмаи таълимию маърифатӣ бо фарогирии таълиму тарбия аз боғча то таълимгоҳи олӣ дар назар дошта шудааст.
Баъдан раиси шаҳри Хуҷанд бо вазъи сохтмони меҳмонхонаи панҷситорадори «Парламент», ки дар соҳили рости дарёи Сир бунёд мегардад, шинос гардид.
Меҳмонхонаи мазкур бо риояи талаботи имрӯзаи сохтмонӣ ва меъморӣ сохта шуда, аз маҷмаи фароғатӣ, фарҳангӣ, варзишӣ, обутоби бадан, маркази савдо, 28 ҳуҷра ва 52 кат иборат буда, баъди мавриди истифода қарор гирифтани он 35 нафар бо ҷойи кори доимӣ таъмин мегарданд. Корҳои сохтмониро Ширкати «Қандинвестсохт» ба уҳда дошта, ин нахустин меҳмонхонаи панҷситорадор дар вилояти Суғд хоҳад буд. Раҷаббой Аҳмадзода аз корҳои сохтмонии то имрӯз ба анҷомрасида изҳори қаноатмандӣ намуда, таъкид дошт, ки барои мувофиқат ба талаботу меъёрҳои чунин меҳмонхона сифати хизматрасонӣ бояд намунаи ибрат бошад.