И. Гулов: «Ҳаҷми умумии гардиши моли савдои чакана ва хӯроки умумӣ ба 86,2 млн. сомонӣ расонида шуд»

Душанбе, 22.0.1.2015. (АМИТ «Ховар»).- «Аз ҳама намуди андоз ба буҷети кишвар зиёда аз 31,6 млн. сомонӣ пардохт шуда, даромади умумии нақшавии бадастомада 97,0 млн. сомониро ташкил намуд. Ҳаҷми умумии гардиши моли савдои чакана ва хӯроки умумӣ ба 86,2 млн. сомонӣ расонида шуд, ки аз он муомилоти молии муассисҳои хӯроки умумӣ 20,4 млн. сомониро ташкил медиҳад»,- чунин иброз намуд муовини раиси Раёсати Иттифоқи “Тоҷикматлубот” Иброҳим Гулов имрӯз зимни нишасти матбуотӣ.
Тавре ки роҳбарияти ин ниҳод зикр кард, соли 2015 корхонаҳои истеҳсолии соҳа ба маблағи 10,8 млн. сомонӣ молу маҳсулот истеҳсол карданд, ки 10,2 млн. сомонии он истеҳсоли маводи хӯрокӣ мебошад.
Дар бозорҳои соҳа дар соли ҳисоботӣ ба аҳолӣ ба маблағи 4,5 млн. сомонӣ хизмати пулакӣ расонида шуда, ҳаҷми пардохти доимии яквақта 9,8 млн. сомониро ташкил намуд. Иҷорапулӣ дар бозорҳо ба 7,2 млн. сомонӣ расонида шуд. Даромади умумии бозорҳо аз 3 намуди асосии фаъолият 21,5 млн. сомониро ташкил дод.