«Кор бо захираи кадрҳо дар мақомоти давлатӣ қаноатбахш роҳандозӣ нашудааст»-Директори Агентии хизмати давлатӣ

Душанбе, 12.01.2016. (АМИТ «Ховар»). — Дар нишасти матбуотии Агентии хизмати давлатии назди Президенти ҶТ, ки имрӯз, 12 январ баргузор гардид, таъкид шуд, ки дар соли 2015 тибқи талабот 2 ҳазору 742 нафар (занон — 935 ё 34,1 фоиз) ба рўйхати кадрҳои захира дохил карда шуд, ки аз ин 862 нафарро ҷавонони то 35 — сола (31,4 фоиз) ва 289 нафар (33,5 фоиз)- ро занони то 35 — сола ташкил медиҳанд.
“Дар ин давра мақомоти давлатӣ ҳамагӣ 25 (занон — 5) нафар хизматчии давлатиро аз захираи кадрҳо ба мансабҳои роҳбарикунанда пешниҳод намудаанд, ки аз фаъолияти нокифояи онҳо дар ин самт дарак медиҳад. Кор бо захираи кадрҳо дар мақомоти давлатӣ қаноатбахш роҳандозӣ нашудааст”,-иттилоъ дод директори агентӣ Ҷ.Давлатов.
Бино ба гуфтаи директори агентӣ, оид ба ҳолати кор бо захираи кадрҳо, ҷойивазкунӣ, баҳодиҳии фаъолияти хизматчии давлатӣ, гузаронидани аттестатсия ва озмунҳо гузоришҳои таҳлилӣ омода шуда, барои ислоҳи камбудиҳо ба мақомоти давлатӣ ирсол гардиданд.
“Дар соли 2015 Агентии хизмати давлатӣ 1 ҳазору 19 нафар хизматчии давлатиро барои такмили ихтисос дар Донишкадаи идоракунии давлатии назди Президенти Ҷумҳурии Тоҷикистон ҷалб намуд, ки аз ин теъдод 384 нафар ё 37,6 фоизро занон ташкил медиҳанд”,-илова намуд Ҷумъа Давлатов.