Ҳодисаҳои нақлиётии нохуш дар кишвар

Душанбе, 18.01.2016. (АМИТ «Ховар»). — 16-уми январ ронандаи мошини тамғаи “ВАЗ-21015”, сокини 30-солаи шаҳри Кӯлоб, ҳангоми ҳаракат аз ноҳияи Данғара ба самти шаҳри Қурғонтеппа дар ҳудуди ҷамоати деҳоти Оқсуи ноҳияи Данғара аз уҳдаи идораи воситаи нақлиёт набаромада, ба мошини тамғаи “Опел-Астра”, таҳти идораи сокини 30-солаи ноҳияи Восеъ бархӯрдааст.
Дар натиҷа мусофири дохили мошини тамғаи “ВАЗ-21015” сокини 25-солаи шаҳри Кӯлоб ҷароҳати вазнини ҷисмонӣ бардошта, дар беморхона ба ҳалокат расидааст.
Инчунин ронандаи мошини тамғаи “ВАЗ-21015” ва мусофири дигари мошини мазкур сокини 36-солаи шаҳри Кӯлоб ҷароҳатҳои гуногуни ҷисмонӣ бардошта, дар беморхона бистарӣ гаштаанд.
Дар ин рӯз, ҳамчунин, ронандаи мошини тамғаи “Опел-Астра”, сокини 25-солаи ш. Қурғонтеппа, ҳангоми ҳаракат аз ноҳияи Шаҳритуз ба самти ноҳияи Хуросон, дар ҳудуди деҳаи Хумдони ноҳияи Хуросон бехатарии ҳаракат дар роҳро риоя карда натавониста, духтарчаи 7-солаи ин деҳаро пахш намудааст. Дар натиҷа пиёдагарди ноболиғ ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.