Ҷоми Иттиҳод: Дастаи ҷавонони Тоҷикистон бозиро ба Эстония бохт

Душанбе, 20.01.2016. (АМИТ «Ховар»). — Дастаи мунтахаби ҷавонони Тоҷикистон оид ба футбол, ки иборат аз бозингарони синнашон на калонтар аз соли 1994 мебошад, дар мусобиқот барои дарёфти Ҷоми Иттиҳод — 2016 дар Санкт — Петербург маротибаи дуюм ноком шуд. Шогирдони Роман Пилипчук дар вохӯрии даври дуюми сабқати гурӯҳӣ бозиро бо ҳисоби 1:4 ба дастаи Эстония бохтанд. Тӯби ягонаро дар ҳайати дастаи мунтахаби кишвар ниммуҳофизи дастаи «Истиқлол» — и пойтахт Парвизҷон Умарбоев аз масофаи 11 метр ба дарвозаи ҳариф ворид намуд.
Дар вохӯрии дигари гурӯҳи мо дастаи Русия дастаи Латвияро бо ҳисоби 2:1 мағлуб сохт. Баъди ду даври мусобиқот футболбозони Эстония ва Русия, ки ҳар кадом 6 холӣ доранд, пешсафи ҷадвали гурӯҳи «В» мебошанд. Дастаҳои мунтахаби Тоҷикистону Латвия, ки 21 январ бо ҳам вомехӯранд, дар мусобиқот ҳанӯз ягон хол надоранд.
Дастаи мунтахаби Молдова дар гурӯҳи «А» яке аз аввалинҳо шуда, ба вохӯрии ниҳоӣ барои дарёфти Ҷоми Иттиҳод — 2016 роҳхат ба даст овард.
Ёдовар мешавем, ки мувофиқи тартиби мусобиқот ғолибони гурӯҳҳо дар вохӯрии ниҳоӣ қувваозмоӣ менамоянд. Дастаҳое, ки ҷойҳои дуюмро ишғол менамоянд, барои дарёфти медалҳои биринҷӣ қувваозмоӣ мекунанд. Дастаҳое, ки дар гурӯҳҳо ҷойҳои сеюмро ба даст меоранд, барои гирифтани ҷойи панҷум вомехӯранд.