Паём роҳнамои фаъолияти Хадамоти муҳоҷират аст!

Душанбе, 21.01.2016 (АМИТ «Ховар»).- Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон Паёми анъанавии Президенти мамлакат Эмомалӣ Раҳмонро ба Маҷлиси Олии Ҷумҳурии Тоҷикистон ҳамасола чун роҳнамои фаъолияти худ қабул менамояд ва барои татбиқи муҳимтарин нуқтаҳои он тадбирҳои амалӣ меандешад.
Аз ҷумла, 20 январи соли равон дар Хадамоти муҳоҳират шунидани Паёми Президент ба таври муташаккилона ба роҳ монда шуд.
Бо мақсади дар сатҳи баландтар омўхтан ва шинос шудан бо Паёми Пешвои миллат ба Маҷлиси Олии Ҷумҳурии Тоҷикистон 20 январи соли равон масъалаи ташвиқу тарғиб ва омўзиши давра ба давраи Паём дар маҷлиси машваратии назди сардори хадамот баррасӣ гардид.
Бино ба иттилои масъулини хадамот, роҳбарияти Хадамоти муҳоҷират тамоми кормандонро бо матни пурраи Паём таъмин намуда, омўзиши амиқи онро талаб хоҳанд кард. Дар ҷараёни санҷиши донишу малакаи кории кормандон, аттестатсия ва интихоби мутахассисон оид ба Паёми Президент ва муҳимтарин нуктаҳои он саволу ҷавоб хоҳад шуд.
Мисолҳои мушаххас ва рақамҳои овардаи муҳтарам Эмомалӣ Раҳмон соли равон низ нишон доданд, ки Тоҷикистонро ояндаи дурахшон дар пеш аст. Ғамхориҳои давлату Ҳукумат, шахсан Президенти кишвар Эмомалӣ Раҳмон нисбат ба соҳаҳои иҷтимоӣ ва табақаҳои ниёзманд, нақшаҳои минбаъдаи рушду нумуъ ва ҳадафи асосии зикрнамудаашон ба аҳли ҷомеаи меҳнатии Хадамоти муҳоҷират рўҳу илҳоми тоза бахшид.
Дар маҷмўъ аҳли кормандони Хадамоти муҳоҷират якдилона Паёмро маъқул дониста, ҷонибдорӣ карданд ва барои таъмини иҷрои саривақтии вазифагузориҳои муҳтарам Эмомалӣ Раҳмон дар самтҳои танзими раванди муҳоҷират, касбомўзонию забономўзонӣ ва баланд бардоштани сатҳи маърифати аҳли ҷомеа, ташвиқу тарғиби дастовардҳои Истиқлолият ва сиёсати давлату Ҳукумат, пешгирии омилҳои номатлуб, бузургдошти забони давлатӣ ва дастгирии ниёзмандон мунтазам кўшиш ба харҷ медиҳем.
Паёми Президенти Ҷумҳурии Тоҷикистон ба Парлумони касбии мамлакат самтҳои асосии фаъолияту зиндагии кулли тоҷикистониёнро барои як сол ва солҳои минбаъда муайяну мушаххас кард. Хадамоти муҳоҷират баҳри иҷрои саривақтии ҳама вазифагузориҳои Ҷаноби Олӣ Эмомалӣ Раҳмон аз имкониятҳо босамар истифода хоҳад бурд.