Президенти Тоҷикистон: Пешрафти ояндаи ҷаҳон аз энергияи барқароршаванда вобастагии зиёд дорад

Душанбе, 20.01.2016 (АМИТ «Ховар») .- «Пешрафти ояндаи ҷаҳон аз энергияи барқароршаванда вобастагии зиёд дорад, зеро он омили муҳими таъмин намудани тараққиёти босуботи иқтисодию иҷтимоӣ, ташаккули иқтисоди сабз, ҳифзи муҳити зист, пешгирии офатҳои табиии вобаста ба тағйирёбии иқлим ва коҳиши партовҳои гази карбон мебошад»,- баён дошт Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон зимни ироаи Паёми имсола ба Маҷлиси Олӣ.
Тоҷикистон чун кишвари дорои захираҳои фаровони об, ҷонибдори истифодаи одилонаю оқилонаи ин захираҳо тавассути ҳамкории байналмилалӣ ва минтақавӣ мебошад ва татбиқи пайгиронаи дипломатияи ҳамкорӣ дар соҳаи обро ягона василаи ҳалли мушкилот дар ин самт медонад, зеро дастрасӣ ба энергия дар роҳи расидан ба ҳадафҳои рушди устувор нақши калидӣ дошта, хусусан барои кишварҳои тараққикунанда ва кӯҳистон ба масъалаи муҳимтарини рӯз табдил ёфтааст.
«Аз ин лиҳоз барои Тоҷикистон масъалаи дастрасӣ ба энергия барои таъмин намудани тараққиёти иқтисодиву иҷтимоӣ ва коҳиш додани камбизоатӣ аҳамияти хосса дорад»,-илова намуд Президенти Тоҷикистон.