Сатҳи таваррум 2,3 банди фоизӣ кам гардида, 5,1 фоизро ташкил намуд

Душанбе, 26.01.2015. (АМИТ «Ховар»).- Раиси Бонки миллии Тоҷикистон Ҷамшед Нурмаҳмадзода имрӯз, 26 январ зимни нишасти матбуотӣ иброз намуд, ки сатҳи таваррум нисбат ба соли қаблӣ 2,3 банди фоизӣ кам гардида, 5,1 фоизро ташкил намуд.
“Бӯҳрони молиявию иқтисодии ҷаҳонӣ, коҳиши талаботи дохилӣ ва даромаднокии аҳолӣ ба паст гардидани сатҳи таваррум дар кишвар мусоидат намуд. Таварруми ҳосилшуда асосан аз ҳисоби болоравии нархи маҳсулоти хӯрокворӣ 4,3 фоиз, ғайрихӯрокворӣ 7,8 фоиз ва хизматрасонии пулакӣ 2,3 фоиз ба вуқуъ пайваст”,-афзуд раиси БМТ.
Хотиррасон мекунем, ки тибқи «Дурнамои сиёсати пулию қарзӣ барои соли 2015» нишондиҳандаи мазкур дар сатҳи 7,5 фоиз пешбинӣ гардида буд.