Таъмири наздик ба 300 км роҳ дар ноҳияи Б.Ғафуров дар соли 2015

Б.Ғафуров. 12.01.2016. (АМИТ “Ховар”).- Дар соли сипаригаштаи 2015 дар ноҳияи калонтарини шимоли кишвар- Бобоҷон Ғафуров дар самти иҷрои барномаи вилоятии “Соли 2015 — соли идомаи роҳҳои обод” ҳолати наздик ба 300 км роҳҳои ноҳия беҳ карда шуд.
Тавре ки зимни нишасти матбуотӣ иттилоъ дода шуд, соли 2015 аз ҳисоби сарчашмаҳои гуногун ва ҷалби сармояҳои соҳибкорон ва аҳолӣ аз таъмир баровардани 253,2 км роҳҳо ба нақша гирифта шуда, дар амал дар давраи ҳисоботӣ зиёда аз 293 км роҳҳои ноҳия таъмир шуданд. Аз ҷумла, 21,59 км роҳҳо пурра мумфарш, 167,9 км роҳҳо аз таъмири ҷорӣ бароварда шуда, зиёда аз 103,46 км роҳ шағалпӯш карда шуданд. Дар умум баҳри амалишавии корҳои мазкур аз буҷаи маҳаллӣ зиёда аз 11,8 млн. сомонӣ равона гардидааст.
Дар миқёси вилояти Суғд соли 2015 дар доираи барномаи мазкур дар шаҳру ноҳияҳои вилоят 3630,2 км роҳҳои мошингард, аз ҷумла 221 км таъмири асосӣ, 1442,3 км таъмири ҷорӣ ва 1966,4 км шағалпӯш карда шуданд, ки ин нишондод нисбат ба соли 2014 — 29,9% зиёд аст.