Вазири корҳои хориҷии Ироқ аз иштироки неруҳои хориҷӣ ба муқобили террористон изҳорот додааст

Душанбе, 25.01.2016 (АМИТ «Ховар») — Вазири корҳои хориҷии Ироқ Иброҳим ал-Ҷаъфарӣ изҳор кардааст, ки Ироқ ба муқобили терроризм бе иштироки неруҳои хориҷӣ мубориза мебарад. «Таҳия ва идораи амалиёти махсуси ҷангӣ ба муқобили терроризм дар Ироқ танҳо ба воситаи неруҳои ироқӣ, бе иштироки неруҳои ҳарбии хориҷӣ пеш бурда мешавад»,-чунин изҳор намуд ал-Ҷаъфарӣ зимни мусоҳиба бо журналистон. Ин суханони вазири корҳои хориҷии Ироқ ду рӯз баъд аз изҳороти вазири мудофиаи ИМА Эштон Картер дар хусуси сафарбар шудани дивизияи яккачини десантии 101-уми амрикоӣ барои озод кардани шаҳрҳои Мосули Ироқ ва Раққаи Сурия аз дастаҳои ҷангии гурӯҳи террористии ба ном «Давлати исломӣ» садо дод.
Хотиррасон бояд шуд, ки ду сол қабл неруҳои ҳарбии Ироқ даҳҳо шаҳру деҳаҳоро ба ҳоли худ гузошта, ба ҷониби Бағдод фирор карда буданд ва бо ин амали худ барои дастаҳои ҷангии гурӯҳи террористии ба ном «Давлати исломӣ» имконият доданд, ки ҳузуру нуфузи худро дар Ироқ ва Сурия афзоянд.