Ю.Бин: «Чин хостори ҳар чи бештари таҳкими равобит бо Тоҷикистон аст»

Душанбе, 28.01.2016.(АМИТ «Ховар»).-Дурнамои равобити гунонунсоҳаи Тоҷикистону Чин имрӯз дар мулоқоти Шукурҷон Зуҳуров -раиси Маҷлиси намояндагони Маҷлиси Олии ҷумҳурӣ бо Юе Бин -сафири фавқулодда ва мухтори Ҷумҳурии Мардумии Чин дар Ҷумҳурии Тоҷикистон матраҳ гардид.
Шукурҷон Зуҳуров ба дипломати чинӣ роҷеъ ба фаъолияти палатаи поёнии Парлумони Тоҷикистон маълумот дода, зикр кард, ки ҳамкорӣ байни Парлумони Тоҷикистон ва Маҷлиси Умумичинии намояндагони халқи Ҷумҳурии Мардумии Чин беш аз пеш густариш ёфта, дар Маҷлиси намояндагони Маҷлиси Олии Ҷумҳурии Тоҷикистон гурӯҳи дӯстӣ ва ҳамкорӣ бо парлумони Чин таъсис шудааст.
Бо дахли равобити ҳасанаи ду кишвари ҳамҷавор Шукурҷон Зуҳуров таъкид кард, ки миллати тоҷик ба мавқеи Чин барои эътирофи кишвари мо ҳамчун ҷумҳурии соҳибистиқлол баҳои баланд медиҳад. Чин ягона кишвари абарқудрат буд, ки аз аввалинҳо шуда, истиқлолияти Тоҷикистонро ба расмият шинохт ва равобити дипломатӣ барқарор намуд». Раиси Маҷлиси намояндагон зикр кард, ки: «бо таваҷҷуҳ ба иқтидори бузурги иқтисодӣ, сиёсӣ ва низомӣ, мавқеи ҷуғрофӣ ва соҳиби таҷрибаи ғании навсозӣ будани кишвар, қабл аз ҳама, вобаста ба гузариш ба муносиботи бозорӣ, Чин дар сиёсати хориҷии Ҷумҳурии Тоҷикистон мавқеи арзишмандро ишғол менамояд». Таъкид шуд, ки алҳол дар Тоҷикистон бо кумак ва сармояи Чин беш аз 100 тарҳи муштарак дар бахшҳои иқтисод, бахусус дар заминаи энергетика ва коммуникатсия дар ҳоли иҷро қарор доранд. То кунун дар Тоҷикистон 500 корхонаи муштараки Тоҷикистону Чин фаъолият менамоянд.
Мусоҳибон зимни мулоқот доир ба тавсеаи ҳамкории мутақобилан судманди ду кишвар дар арсаҳои мухталиф-иқтисоду тиҷорат, энергетика, нақлиёт, амният ва илму фарҳанг ибрози назар намуданд.
Дипломати Чин Юе Бин дар навбати худ аз сатҳи ҳамкории кишвараш бо Ҷумҳурии Тоҷикистон дар тамоми соҳаҳо, махсусан дар заминаи амниятиву низомӣ изҳори қаноатмандӣ намуда, иброз дошт,
ки Чин дорои зарфиятҳои бештари таҳкими равобит бо Тоҷикистон мебошад ва ин кишвар ҳар замон омода аст, ки аз ин зарфиятҳо барои миллату мардуми Тоҷикистони дӯсту ҳамҷавор истифода намояд.
Мавсуф ҳамчунин тақвияти муносиботи кишварашро дар бахши парлумонӣ ва низомиву амниятӣ бо Ҷумҳурии Тоҷикистон барои таъмини амният ва сулҳу субот дар кишварҳои якдигар ва ҳифзи марзи муштарак муҳим арзёбӣ кард.