1678 ҷинояти коррупсионӣ ва ба андоз алоқаманд ошкор шуд, ки 510 ҳолати онро ҷиноятҳои вазнин ташкил медиҳанд

Душанбе, 2.02.2015. (АМИТ «Ховар»).- «Дар давраи ҳисоботӣ аз тарафи воҳидҳои ҳифзи ҳуқуқи агентӣ 1678 ҷинояти коррупсионӣ ва ба андоз алоқаманд ошкор шуд, ки 510 ҳолати онро ҷиноятҳои вазнин ташкил дода, нисбат ба ҳамин давраи соли гузашта мутаносибан 207 ва 72 ҷиноят зиёд мебошад»,-зикр намуд, Аламхон Наимӣ, муовини аввали директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон имрӯз зимни нишасти матбуотӣ.
Ба гуфтаи роҳбарияти агентӣ, аз шумораи умумии ҷиноятҳои ошкоршуда ба Вилояти Мухтори Кӯҳистони Бадахшон-80 ҷиноят, вилоятҳои Хатлон-477, Суғд-481, шаҳри Душанбе-383 ва шаҳру ноҳияҳои тобеи ҷумҳурӣ-257 ҷиноят рост меояд.
Зарари молиявӣ аз рӯи ҷиноятҳои ошкоргардида 269 миллион сомониро ташкил дода, дар ҷараёни санҷишу таҳқиқ — 55 миллион сомонӣ барқарор гардидааст.