Ҷаласаи Шӯрои ҳамоҳангсозӣ оид ба пешгирии суиистифодаи маводи нашъаовар

Душанбе, 26.02.2016. (АМИТ «Ховар»).-«Муомилоти ғайриқонунии маводи нашъадор ва суиистифодаи он барои тамоми ҷомеа мушкилоти ҷиддиро ба бор оварда, зарурати қабули амалҳои ҷиддӣ оид ба пешгирии нашъамандӣ ва мубориза бар зидди муомилоти ғайриқонуниии маводи нашъаовар пеш омадааст. Сарфи назар аз натиҷаҳои бадастомада дар самти муқовимат ба суиистифодаи маводи нашъаовар ва ҷиноятҳои вобаста бо онҳо, мушкилоти ҷалб намудани қисми муайяни аҳолӣ ба муҳити нашъамандон ва муомилоти ғайриқонунии маводи нашъадор дар кишвар муҳим мебошанд», — гуфт Шерхон Салимзода зимни оғози ҷаласаи Шӯрои ҳамоҳангсозӣ оид ба пешгирии суиистифодаи маводи нашъаовар, ки имрӯз дар Агентии назорати маводи нашъаовар баргузор гардид.
Дар кори ҷаласа, ки аъзои Шӯро аз ҳисоби роҳбарияти вазорату идораҳои дахлдор иштирок доштанд, ҳамчунин рафти иҷрои «Барномаи миллии пешгирии паҳншавии нашъамандӣ ва такмили ёрии наркологӣ дар Ҷумҳурии Тоҷикистон барои солҳои 2013-2017» ва фаъолияти Маркази мониторинги миллӣ ва пешгирии нашъамандии Вазорати тандурустӣ ва ҳифзи иҷтимоии аҳолӣ муҳокима гардиданд.
Дар хотима нақшаи фаъолияти Шӯрои ҳамоҳангсозӣ оид ба пешгирии суиистеъмоли маводи нашъадор дар соли 2016 тасдиқ гардид.