Ҳамоиши илмӣ доир ба муаммоҳои моделсозии макроиқтисодӣ

Душанбе, 27.02.2016. (АМИТ «Ховар»).- «Проблемаҳои муҳими моделсозии макроиқтисодӣ ва дурнамои истифодаи технологияҳои иттилоотӣ» — таҳти чунин унвон дирӯз дар Донишкадаи молия ва иқтисоди Тоҷикистон конфронси илмию амалӣ доир гардид.
Тавре ки аз донишкадаи мазкур хабар доданд, муовини ректор оид ба илм Ғиёсиддин Ашуров иброз дошт, ки бо назардошти муҳимияти мавзӯи баррасишаванда моро зарур аст, ки муаммоҳои муҳими дар сатҳи макроиқтисодӣ мавҷударо бо истифодаи моделҳои макроиқтисодӣ ва технологияҳои иттилоотӣ бартараф намуда, дар рушди иқтисодиёти ҷумҳурӣ саҳм дошта бошем.
Дар конфронс дар мавзӯъҳои «Оид ба як модели иқтисодӣ-математикӣ», «Технологияи иттилоотӣ ва пешрафти сармояи инсонӣ дар ҷабҳаи рушди иқтисод» маърӯзаҳо шунида шуданд.
Гуфта шуд, ки дар замони муосир истифодаи технологияҳои муосири иттилоотӣ имкон медиҳанд, ки натиҷаҳои таҳқиқот воқеиятро нишон диҳанд. Бинобар ин шарҳи дурусти воқеаҳои иқтисодӣ дар шароити Тоҷикистон барои дуруст ба роҳ мондани банақшагирӣ ва идораи он мусоидат хоҳад кард.