Ба беш аз 70 навдаъватшуда рутбаи сержанти хурд дода шуд

Душанбе, 23.02.2016.(АМИТ «Ховар»).-Дар маркази таълимии «Пойтахт»-и қӯшунҳои сарҳадӣ бахшида ба 23-юмин солгарди таъсиси Артиши миллӣ ва шарҳи Паёми навбатии Сарфармондеҳи Олии Қувваҳои мусаллаҳи Ҷумҳурии Тоҷикистон, Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вохӯрии Фармондеҳи қӯшунҳои сарҳадии КДАМ Ҷумҳурии Тоҷикистон Раҷабалӣ Раҳмоналӣ, сардори Сарпрокуратураи ҳарбии Ҷумҳурии Тоҷикистон С. Мирзозода бо афсарон, прапоршикон ва сарбозони навдаъватшудаи маркази таълимии «Пойтахт» баргузор гардид.
Зимни вохӯрӣ фармондеҳи қӯшунҳои сарҳадии КДАМ вобаста ба нуктаҳои Паёми навбатии Пешвои миллат бобати баланд бардоштани сатҳи таълиму тарбия, омодабошии ҷангӣ ва малакаи касбии низомиён, вусъати корҳои тарбиявӣ ва ҳисси ватанпарварии хизматчиёни ҳарбӣ, садоқати онҳо ба Ватан, риояи интизоми ҳарбӣ, интихобу ҷобаҷогузории кадрҳои соҳа, инчунин мубориза бар зидди қонуншиканиҳо ва дар навбати аввал кирдорҳои коррупсионӣ, муомилоти ғайриқонунии маводи мухаддир ва дигар масъалаҳое, ки ба ҳаёти ҷомеаи имрӯза, вазъи иҷтимоиву иқтисодӣ ва сиёсии кишвар дахл дорад, муфассал маълумот дод.
Сарпрокурори ҳарбӣ афсарону сарбозони қисми низомиро бо 23-юмин солгарди Артиши миллӣ табрик намуда, барои риояи қатъи қонун, тағйиру иловаҳо ба Конститутсияи Ҷумҳурии Тоҷикистон, ҷинояту ҷинояткорӣ дар сафи қӯшунҳои сарҳадӣ ибрози ақида намуд.
Дар хотима ба беш аз 70 навдаъватшуда рутбаи сержанти хурд дода шуд.
Чунин вохӯрӣ бо ширкати муовини Фармондеҳи қӯшунҳои сарҳадии КДАМ ҶТ оид ба корҳои тарбиявӣ Б. Мирзоев ва намояндагони сарпрокуратураи ҳарбӣ дар Омӯзишгоҳи Олии сарҳадии КДАМ ҶТ баргузор гардид.