Баррасии масъалаҳои хат ва имлои забони тоҷикӣ дар давраҳои Шӯравӣ ва Истиқлол

Душанбе,10.02.2016 (АМИТ«Ховар»).- Имрӯз дар Китобхонаи миллии Тоҷикистон рӯнамоии китобҳои нави профессор Сайфиддин Назарзода доир гардид, ки дар он се китоби муаллиф муаррифӣ шуд.
Яке аз китобҳои муаллиф, ки соли 2015 зери назари доктори илмҳои филология, узви вобастаи АИ Ҷумхурии Тоҷикистон, профессор Додихудо Саймиддинов нашр гардидааст, «Имло ва забони адабӣ» мебошад.
Дар китоб масъалаҳои хат ва имлои забони тоҷикӣ аз лиҳози таърихи ташаккул мавриди пажӯҳиш қарор гирифтаанд. Дар он ба таври мухтасар дар бораи хат ва имлои забонҳои эронии бостон (авестоӣ, форсии бостон) ва миёна (форсии миёна, портӣ, бохтарӣ, суғдӣ, хутану сакоӣ), ки ба забони тоҷикӣ хешовандӣ дошта, ба низоми дастурӣ ва вожагони он таъсиргузор буданд, маълумот дода шуда, намунаи алифбоҳо ва тағйири овозии ин забонҳо баррасӣ шудааст.
Асоси китобро баррасии масъалаҳои хат ва имлои забони тоҷикӣ дар давраҳои шӯравӣ ва соҳибистиқлолӣ ташкил медиҳад.
Китоб барои доираи васеи мутахассисон, донишҷӯён ва алоқамандони забони ноби модарии мо пешбинӣ шудааст.