Боздошти чор корманди ВКД барои нашъаҷаллобӣ аз тарафи ходимони ҳарбии Қӯшунҳои сарҳадии КДАМ оё рост аст?

Душанбе, 23.02.2016.(АМИТ «Ховар»).-“22 феврали соли равон дар расонаҳои иттилотии интернетӣ маълумот оид ба боздошти чор корманди ВКД барои нашъаҷаллобӣ аз тарафи ходимони ҳарбии қӯшунҳои сарҳадии КДАМ ҶТ ба табъ расид, ки ин маълумот асоси воқеӣ надорад”,-гуфт Муҳаммад Улуғхоҷаев, сардори Маркази матбуоти Сарраёсати қӯшунҳои сарҳадии КДАМ ба хабарнигори АМИТ “Ховар”.
Ҳамзамон маркази матбуоти Сарраёсати қӯшунҳои сарҳадӣ иттилоъ дод, ки тибқи нақшаи ҳамкорӣ ва гузаронидани чорабиниҳо оид ба пешгирӣ намудани воридшавии маводи мухаддир аз ҳудуди Ҷумҳурии Исломии Афғонистон ба ҳудуди Ҷумҳурии Тоҷикистон 19 феврали соли 2016 байни КДАМ ва ВКД ҳуҷҷатҳо ба имзо расидаанд.
Мувофиқи маълумоти дақиқи махсуси фаврии қӯшунҳои сарҳадии КДАМ дар ноҳияи Шӯрообод ва мувофиқи нақша 19 феврали соли равон дар минтақаи Хирманҷои ноҳияи Шӯрообод гурӯҳи таъйиноти махсуси қӯшунҳои сарҳадӣ ва кормандони ВКД амалиёти махсуси муштарак гузарониданд.
14 феврали соли 2016 қочоқбарони афғон мувофиқи маслиҳати пешакӣ бо қочоқчиёни тоҷик ният доштанд, ки миқдори калони маводи мухаддирро ба қаламрави Ҷумҳурии Тоҷикистон интиқол диҳанд.
Аз сабаби дар ҳолати пурзӯри муҳофизат қарор доштани сарҳади давлатӣ қочоқчиён 19 феврали соли равон нақшаҳои худро тағйир дода, дар минтақаи яке аз дидбонгоҳи отряди сарҳадии «Шӯрообод» аз ҳудуди Ҷумҳурии Исломии Афғонистон ба қаламрави Ҷумҳурии Тоҷикистон миқдори калони маводи мухаддирро интиқол дода, ба қочоқбарони тоҷик супориданд.
Пас аз супоридан яке аз қочоқбарони афғон, ки ному насаби ӯ бо сабаби халал нарасонидан ба ҷараёни тафтишот фош карда намешавад, дастгир шуд.
Гурӯҳи таъйиноти махсуси қӯшунҳои сарҳадӣ дар якҷоягӣ бо кормандони ВКД барои пешгирӣ намудани интиқоли маводи мухаддир аз ҳудуди Ҷумҳурии Исломии Афғонистон ба Ҷумҳурии Тоҷикистон чораҳои зарурӣ андешиданд.
“19 феврали соли равон соати 22:40 дар минтақаи наздисарҳадии Хирманҷои ноҳияи Шӯрообод мошини сабукрави тамғаи Лексус барои тафтишот боздошт шуд, ки аз бағочи он 56 кг 508 гр маводи нашъа, аз ҷумла 9 кг 430 гр ҳашиш, 965 гр афюн ва 46 кг бангдона дарёфт ва мусодира шуд. Инчунин чор шаҳрванди Ҷумҳурии Тоҷикистон аъзои гурӯҳи ҷиноятпешаи қочоқи маводи мухаддир дастгир ва ба ҳабси пешакӣ гирифта шуданд.
Аз қочоқчиён 2 таппончаи тамғаи ПМ, 4 тирдон, 32 тири тамппончаи ПМ ва 8 телефони мобилии гуногунтамға дарёфт гардид”,-зикр намуд сардори маркази матбуоти қӯшунҳои сарҳадии КДАМ ва илова кард, ки дар оянда низ аз тарафи сарҳадбонони тоҷик барои мустаҳкам намудани сарҳади давлатӣ ва мубориза бо қочоқчиёну вайронкунандагони сарҳад чораҳои мушаххас андешида хоҳанд шуд.
Дар робита ба ин Вазорати корҳои дохилии Тоҷикистон ба АМИТ «Ховар» раддия равон намуд, ки дар он сардори Раёсати мубориза бар зидди гардиши ғайриқонунии маводи мухаддири ВКД, генерал-майор Мустафо Рустамзода нашри ин хабар дар расонаҳоро, ки гӯё чор корманди ин раёсатро дар вилояти Хатлон боздошт карда бошанд, бе ягон далелу асос номидааст.