Боздошти гурӯҳи муташаккили ҷиноятӣ

Душанбе, 22.02.2016 (АМИТ «Ховар») — Суди шаҳри Душанбе шаҳрвандон Саидов Р.М, соли таваллудаш 1982, зодаи деҳаи Далёни ноҳияи Ғончӣ, истиқоматкунандаи шаҳри Душанбе, Ҷалолов Б.И, соли таваллудаш 1977, зодаи деҳаи Дарқади ноҳияи Фархор, истиқоматкунандаи шаҳри Душанбе, Почоев Ф.М, соли таваллудаш 1974, зода ва истиқоматкунандаи деҳаи Озодии ноҳияи Бобоҷон Ғафуров, Гулов И.М, соли таваллудаш 1984, зода ва истиқоматкунандаи шаҳри Душанбе ва Ятимов М.Х, соли таваллудаш 1985, зода ва истиқоматкунандаи деҳаи Тангаии шаҳри Ваҳдатро ба содир намудани ҷиноятҳои дар моддаҳои 200, 289 ва 347-и Кодекси ҷиноятӣ пешбинишуда гунаҳкор дониста, бо ҳукми худ Р.Саидовро ба муҳлати 20 сол, Б.Ҷалоловро ба муҳлати 17 сол, И.Гуловро ба муҳлати 16 сол, Ф.Почоевро ба муҳлати 14 сол ва М.Ятимовро ба муҳлати 1 сол аз озодӣ маҳрум намуд.
Аз маркази робитаҳои ҷамъиятии КДАМ ба АМИТ «Ховар» иттилоъ доданд, ки шахсони бо ҳукми суд маҳкумшуда, 14-уми ноябри соли 2015 зимни амалиёти фаврӣ-ҷустуҷӯии кормандони Кумитаи давлатии амнияти миллӣ дастгир шуда буданд. Кормандони КДАМ зиёда аз 40 кило маводи «героин» ва 17 ҳаби психотропии «экстазӣ»-ро аз мошини «Мерседес» таҳти идораи Б. Ҷалолов дарёфт намуда, сипас мувофиқи нишондоди Б. Ҷалолов дар мағозаи «Далён» аз борхалтаи шахсии Ф. Почоев 990 ҳаби психотропии «экстазӣ»-ро дарёфт ва мусодира карданд. Ҳангоми таҳқиқи минбаъда муайян шудааст, ки шаҳрвандон Р. Саидов, И. Гулов ва М. Ятимов низ дар ин ҷиноят даст доштаанд. Онҳо ҳамчун гурӯҳи муташшакил бо мақсади ба даст овардани даромади муфт ба хариду фурӯш ва интиқоли маводи мухаддир машғул буда, вале ба ҳадафи худ нарасиданд, ки дар натиҷа аз беҳтарин неъмати инсон-озодӣ маҳрум шуданд.