Чаро мардон ба Кумитаи кор бо занон ва оила муроҷиат карданд?

Душанбе, 02.02.2016. (АМИТ «Ховар») .- «Аз нимсолаи дуюми соли 2015 дар кумита утоқи равоншинос ва телефони боварӣ фаъолият мекунанд, ки то ба имрўз 64 нафар аз ҷониби масъулин дар он ҷо қабул шудаанд. Ин нуктаро имрӯз зимни нишасти матбуотӣ раиси Кумитаи кор бо занон ва оилаи назди Ҳукумати ҶТ Қосимзода Идигул Тағо ироа намуд.
Бино ба гуфтаи равоншиноси кумита Дилбар Муродова 5 корманди кумита курсҳои равоншиносиро гузашта, имрӯз ба корафтодагон маслиҳат медиҳанд. «Онҳо дар мавриди хушунат ва зӯроварӣ дар оила ва гирифтани маслиҳати ҳуқуқӣ муроҷиат мекунанд. Аз 64 муроҷиаткарда 17 нафар мард мебошад. Мардон низ барои гирифтани маслиҳати ҳуқуқӣ, мушкилоти оилавӣ ва дарёфти ҷои кор муроҷиат мекунанд»,-илова намуд Д.Муродова.
Ба гуфтаи масъулини кумита ба онҳо ноболиғон низ муроҷиат мекунанд ва аслан ноболиғон бо мушкилии бӯҳронҳои вобаста ба синн муроҷиат мекунанд.
Тавассути телефони боварӣ 18 нафар ва дар давраи ҳисоботӣ ба марказҳои иттилоотӣ — машваратии шаҳру ноҳияҳо 8 ҳазору 841 нафар муроҷиат намудаанд.