Доир ба танзими давлатии соҳаи истеҳсолоти иҷро машварати омӯзишӣ баргузор шуд

ДУШАНБЕ, 16.03.2026 /АМИТ «Ховар»/. Дар Хадамоти иҷрои назди Ҳукумати Ҷумҳурии Тоҷикистон дар мавзуи «Танзими давлатии соҳаи истеҳсолоти иҷро: мушкилоти ҷойдошта ва роҳҳои ҳалли онҳо» машварати омӯзишӣ баргузор шуд. Дар ин хусус АМИТ «Ховар» бо истинод ба Хадамоти иҷро хабар медиҳад.

Машварат дар заминаи татбиқи «Барномаи рушд ва рақамикунонии мақомоти иҷрои Ҷумҳурии Тоҷикистон барои солҳои 2026–2030» доир гардида, ҳадафи он таҳкими иқтидори касбӣ, такмили донишҳои соҳавӣ, таҳлили амиқи мушкилоти амалии фаъолияти истеҳсолоти иҷро ва муайян намудани механизмҳои муассири бартарафсозии онҳо буд.

Тибқи барномаи машварат, машғулият дар шакли маърузаҳои таҳлилӣ, мубоҳисаҳои касбӣ ва омӯзиши ҳолатҳои амалӣ баргузор гардид. Мутахассисони соҳа ва шахсони масъул масъалаҳои мубрами танзими давлатӣ дар самти истеҳсолоти иҷро, такмили заминаи меъёрии ҳуқуқӣ, баланд бардоштани самаранокии назорати дохилиидоравӣ ва таҳкими интизоми хизматиро мавриди баррасии ҳамаҷониба қарор доданд.

Таваҷҷуҳи махсус ба масъалаҳои гузариши марҳилавӣ ба низоми пурраи рақамикунонӣ, ҷорӣ намудани унсурҳои ҳукумати электронӣ, такмили Системаи иттилоотии автоматикунонидаи Хадамоти иҷро, таъмини шаффофият ва дастрасии саривақтии хизматрасониҳои давлатӣ, инчунин баррасии босифат ва фаврии муроҷиатҳои шахсони воқеӣ ва ҳуқуқӣ зоҳир гардид.

Иштирокчиён доир ба мушкилоти амалии фаъолият, аз ҷумла иҷрои санадҳои судӣ, ҳамоҳангсозии ҳамкорӣ бо дигар мақомоти давлатӣ, татбиқи технологияҳои рақамӣ ва баланд бардоштани масъулияти касбӣ пешниҳодҳои мушаххас манзур намуда, тавсияҳои методӣ дарёфт карданд.

Машварати омӯзиши се рӯз идома ёфта, ба иштирокчиён сертификати хатм супорида шуд.

АКС: Хадамоти иҷрои назди Ҳукумати Ҷумҳурии Тоҷикистон