Оид ба дурнамои нави ҳамкории Тоҷикистону Узбекистон конференсияи байналмилалӣ доир шуд
ДУШАНБЕ, 14.03.2026 /АМИТ «Ховар»/. 12 март дар Институти байналмилалии Осиёи Марказии шаҳри Тошканд дар мавзуи «Узбекистон ва Тоҷикистон: дурнамои нави ҳамкории иттифоқӣ ва минтақавӣ» конференсияи байналмилалии илмӣ-амалӣ доир гардид. Дар ин хусус ба АМИТ «Ховар» аз Маркази тадқиқоти стратегии назди Президенти Ҷумҳурии Тоҷикистон хабар доданд.
Конференсия бо ибтикори Институти байналмилалии Осиёи Марказӣ дар ҳамкорӣ бо Маркази тадқиқоти стратегии назди Президенти Ҷумҳурии Тоҷикистон ба таври ҳузурӣ ва маҷозӣ гузаронида шуд.
Мақсади баргузории он муҳокимаи вазъи кунунӣ, дурнамои рушди шарикии Тоҷикистону Узбекистон ва таҳияи пешниҳодҳои коршиносӣ барои ғанигардонии рӯзномаи дуҷониба дар сатҳи олӣ арзёбӣ гардид.
Директори Маркази тадқиқоти стратегии назди Президенти Ҷумҳурии Тоҷикистон Хайриддин Усмонзода зимни конференсия ибоз дошт, ки таҳкими муносибатҳои иттифоқӣ байни Тоҷикистон ва Узбекистон омили муҳими таъмини субот ва рушди устувори Осиёи Марказӣ мебошад.
Ҳамкорӣ байни ду давлат пайваста густариш ёфта, соҳаҳои тиҷоратию иқтисодӣ, нақлиёту логистика, энергетика, маориф ва фарҳангӣ-гуманитарӣ фаро мегирад.
«Қадами муҳим дар рушди муносибатҳои ду мамлакат- ин имзо шудани санади муҳими таърихӣ, яъне «Аҳднома оид ба нуқтаи пайвастшавии марзҳои давлатии се кишвар» байни Тоҷикистон, Қирғизистон ва Узбекистон мебошад. Ин қарор воқеан равандҳои чандсолаи ҳалли масоили марбут ба муайянкунии сарҳадҳои се давлат дар водии Фарғонаро ба анҷом расонид», – гуфта шуд дар конференсия.
Таъкид шуд, ки ин созишнома барои таҳкими минбаъдаи ҳамкории бисёрҷониба заминаи устувор фароҳам оварда, принсипҳои калидии ҳамкорӣ байни давлатҳоро муайян намуд.
Дар ҷараёни конференсия изҳор шуд, ки солҳои охир муносибатҳои Тоҷикистону Узбекистон бо суръати баланди ҳамкории амалӣ тавсиф мешаванд. Қадами муҳим дар ин раванд имзои «Созишнома оид ба муносибатҳои иттифоқӣ» дар соли 2024 буд, ки заминаи марҳилаи нави ҳамкории дуҷонибаро гузошт.
Конфронс аз се бахши асосӣ иборат буд, ки ба рушди шарикии ҳамсоягӣ, густариши ҳамкорӣ дар соҳаҳои иқтисод, нақлиёт, маориф, илм, фарҳанг ва сайёҳӣ бахшида шуд.
Дар натиҷаи муҳокимаҳо иштирокчиён барои рушди минбаъдаи ҳамкории Тоҷикистону Узбекистон пешниҳодҳои амалӣ таҳия намуданд. Ин пешниҳодҳо соҳаҳои тиҷорат, сармоягузорӣ, нақлиёт, ҳамкории саноатӣ ва рушди сармояи инсониро дар бар мегиранд.
АКС: Маркази тадқиқоти стратегии назди Президенти Ҷумҳурии Тоҷикистон
Озмоишгоҳҳои таҳлили канданиҳои фоиданок ва омода кардани намунаи ашёи минералӣ ба истифода дода шуданд
Густариши ҳамкорӣ бо намояндагони Бонки исломии рушд дар соҳаи таҳсилоти касбӣ баррасӣ гардид
Дар Санкт-Петербург бо донишҷӯёни тоҷик оид ба масъалаҳои будубош ва таҳсил вохӯрӣ доир шуд
Дар шаҳри Гулистони вилояти Суғд Форуми дуюми сулҳи Фарғона доир шуд
Байни Маркази тадқиқоти стратегӣ ва Бунёди «Peace Nexus» Ёддошти тафоҳуми ҳамкорӣ ба имзо расонида шуд
ТАРЗИ ҲАЁТИ СОЛИМ. Пиёдагардӣ умри инсонро дароз ва баданро ҷавон мекунад
Дар вилояти Суғд Форуми дуюми сулҳи Фарғона доир мешавад
Дар Маркази рушди ҳунармандӣ ва малакаҳои касбии муосир ба шаҳрвандон ройгон касб омӯзонида мешавад
Ҳайати Тоҷикистон дар ҷаласаи Шурои роҳбарони мақомоти муҳоҷиратии давлатҳои аъзои ИДМ иштирок намуд
Бо саҳми соҳибкорон ва шахсони саховатпеша дар Суғд 5 ҳазору 500 километр роҳҳои маҳаллӣ таъмиру навсозӣ карда шуданд
ПУРСИДЕД, ҶАВОБ МЕДИҲЕМ. Ҳангоми интиқоли маблағ ба кортҳои шахсони ношинос ба чӣ бояд диққат дод?
Дар Алмато платформаи миллии рақамии тандурустии Тоҷикистон муаррифӣ гардид
