Футзали Осиё дар Тошканд

Душанбе, 17.02.2016 (АМИТ «Ховар»).- Имрӯз дар шаҳри Тошканд бозиҳои 4/1 ниҳоии Чемпионати Осиё оид ба футзал баргузор мешаванд. Дастаи мунтахаби футзали Узбекистон бо Ироқ, Таиланд бо Австралия, Ҷумҳурии Исломии Эрон бо Қирғизистон ва Ҷопон бо Ветнам вориди рақобат мешаванд.
Ёдрас мешавем, ки дастаи мунтахаби кишварамон дар доираи ин бозиҳо дар гурӯҳи “С” се вохӯрӣ гузаронида, аз тими мунтахаби Таиланд бо натиҷаи 5 бар 4 ва аз Ветнам бо ҳисоби 8 бар 1 мағлуб гардид ва дар вохӯрии охиринаш бо дастаи мунтахаби Тайпейи Чин натиҷаи мусовии 3 бар 3-ро комёб шуд.
Ҳусейн Шодиев, сармураббии тими мунтахаб изҳор кардааст, ки ӯ аз натиҷаи ин бозиҳо қаноатманд аст, зеро бозингарон дар марҳалаи ниҳоӣ бо тимҳои Тайланд, Ветнам ва Тайпейи Чин нисбат ба бозиҳои марҳалаи интихобӣ, ки дар шаҳри Хуҷанд барпо гардиданд, беҳтар бозӣ карданд.