Густариши муносиботи дуҷонибаи Тоҷикистон бо кишварҳои хориҷӣ

Душанбе, 04.02.2016 (АМИТ «Ховар»). -«Боздиди кории Сарвазири Покистон Навоз Шариф рӯзҳои 9-10 июни соли 2015 аз Душанбе ва сафари давлатии Президенти Ҷумҳурии Тоҷикистон рӯзҳои 11-13 ноябри соли гузашта ба Исломобод ба таъйини самтҳои нав ва ҷавобгӯ ба сиёсати дохилию хориҷии кишварамон таъсири мусбат расониданд», — гуфта шуд дар нишасти матбуотии Вазорати корҳои хориҷии Ҷумҳурии Тоҷикистон имрӯз, 4 феврал дар Душанбе.
Ҳамзамон илова карда шуд, ки муносибатҳои дуҷониба бо Ҷумҳурии Ҳиндустон соли гузашта дар соҳаҳои сиёсӣ, иқтисодӣ, тиҷоратӣ, амният, ҳарбӣ, илм, маориф ва фарҳанг пайгирона густариш ёфтанд.
Дар ин давра таҳаввули ҷиддӣ дар равобит миёни Тоҷикистон ва Арабистони Саудӣ- ин сафари расмии Сарвари давлат Эмомалӣ Раҳмон ба Шоҳигарии Арабистони Саудӣ буд, ки рӯзҳои 3-5 январи соли равон ба вуқӯъ пайваст. Дар ҷараёни ин сафар 5 санади нави ҳамкорӣ миёни ду кишвар ба имзо расида, заминаи мусоид барои ҷалби сармояи Саудӣ ба кишвари мо фароҳам омад.