Хатлон: Лоиҳа оид ба саломатӣ ва ғизо амалӣ мегардад

Душанбе, 11.02.2016 (АМИТ «Ховар»).- Агентии ИМА оид ба рушди байналмилалӣ (USAID) лоиҳаи навро оид ба саломатӣ ва ғизо дар қисмати ғарбии вилояти Хатлон муаррифӣ намуд.
Лоиҳа оид ба саломатӣ ва ғизо ба баланд бардоштани сифати хизматрасонии тиббӣ дар сатҳи оила, ҷамоат, дармонгоҳ ва кишвар, беҳтар намудани вазъи саломатии модару кӯдак, бахусус дар самти беҳбуди ғизо, тозагии санитарӣ ва беҳдоштии онҳо мусоидат намуда, фаъолияти он дар самти дастгирии хоҷагиҳои хурди деҳқонӣ, бахусус бо иштироки занон равона шудааст.
Лоиҳаи мазкур, ки аз ҷониби USAID ба мeҳлати панҷ сол маблағгузорӣ мегардад, имкониятҳои кормандони тиббро дар бахши ҳифзи саломатии модару кӯдак фароҳам оварда, ба ҷамоатҳо тавассути мураб,иёни ҷамъиятии соҳаи тандурустӣ ва кумитаҳои рушди деҳот дар сайқал додани донишу малака оид ба нигаҳдории маводи ғизоӣ, тақсими буҷаи оила, коркарди заминҳои наздиҳавлигӣ ва асосҳои беҳдошти шахсӣ, дар арзёбӣ ва такмили сиёсати миллӣ дар самти ҳифзи саломатии модару кӯдак мусоидат хоҳад кард.