Ифтитоҳи Маркази муҳоҷирати гуногунсоҳа дар Маскав

Душанбе, 02.02.2016 (АМИТ «Ховар»). -Роҳбари намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия Зоҳир Мирзоев дар маросими ифтитоҳи расмии Маркази муҳоҷирати гуногунсоҳа дар шаҳри Маскав иштирок намуд. Бино ба иттилои намояндагӣ, маркази муҳоҷират дар назди деҳаи Сахарово ҷойгир буда, яке аз бузургтарин марказҳо дар саросари Русия маҳсуб мешавад. Дар марказ шаҳрвандони хориҷӣ бо усули «равзанаи ягона» метавонанд ҳамаи ҳуҷҷатҳои лозимиро барои гирифтани шаҳодатномаи меҳнатӣ ба расмият дароранд. Барои гирифтани дафтарчаи меҳнатӣ бо худ доштани шиноснома ва варақаи муҳоҷирӣ бо мақсади «кор» кифоя мебошад.
Дар маросими ифтитоҳ ҳамчунин раиси шаҳри Маскав Сергей Собянин, раиси Хадамоти муҳоҷирати Русия Константин Ромодановский ва роҳбари Маркази бисёрсоҳавии муҳоҷират Николай Федосеев иштирок доштанд.
З. Мирзоев бо тартиби азназаргузаронӣ ва озмоиши тиббии муҳоҷирон шинос шуд. Бояд зикр кард, ки марказ бо таҷҳизоти муосири тиббӣ, аз ҷумла бо дастгоҳи рентгенӣ муҷаҳҳаз шудааст. Ҳамчунин роҳбари намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия аз синфхонаҳои омодасозии муҳоҷирон барои супоридани имтиҳонҳо дидан карда, бо муаллимон ва санҷишгарон суҳбат орост. Ҳамчунин дар ҳудуди марказ барои муҳоҷирони меҳнатие, ки ба манзил ниёз доранд, меҳмонхона бо тамоми шароит пешбинӣ шудааст.