«Ҷилваи ҳусн» барои тарроҳон

Душанбе, 4.02.2016 (АМИТ «Ховар»).- Тибқи  Нақшаи Ҳукумати Ҷумҳурии Тоҷикистон оид ба баргузории семинарҳои омӯзишӣ барои тарроҳон ва иштирокдорони  даври якуми фестивали «Ҷилваи ҳусн» дар шаҳри Қурғонтеппа семинари омӯзишӣ гузаронида шуд.
Дар семинар ректори Донишкадаи давлатии санъати тасвирӣ ва дизайни Тоҷикистон Ғанизода Ҷамшед Шуҷоат, омӯзгори ҳамин донишкада Мадина Зуҳурова, сардори Раёсати кор бо занон ва оилаи мақомоти иҷроияи маҳаллии ҳокимияти давлатии вилояти Хатлон Самизода С. ва 65  тарроҳи шаҳру ноҳияҳои вилоят иштирок доштанд.
Қобили зикр аст, ки дар семинар намояндаи Кумитаи кор бо занон ва оилаи назди Ҳукумати Ҷумҳурии Тоҷикистон Мадина Бобоева оид ба арзишҳои фарҳанги ниёгон, зебоии пероҳани тоҷикона, арҷ гузоштан ба мероси миллати тоҷик ва мақсаду шартҳои фестивал сухан гуфт.
Ректори Донишкадаи давлатии санъати тасвирӣ ва дизайни Тоҷикистон Ғанизода Ҷамшед Шуҷоат ва Мадина Зуҳурова дар бораи таърих ва ташаккули либоси миллӣ, тарҳи либос, нозукиҳои дӯхт ва сифати он сухан ронда, барои риоя намудани шартҳои фестивал тавсияҳо доданд.