Истифодаи далелҳои расмӣ аз сомонаҳои вазорату идораҳо

Душанбе, 19.02.2016. (АМИТ «Ховар»).- Дирӯз дар шаҳри Душанбе дар мавзӯи «Ҳамкории тарафҳо. Инъикоси масоили иқтисодӣ дар ВАО» мизи мудаввар доир гардид. Маҳфилро ташкилоти ҷамъиятии «Хома» бо дастгирии Ташкилоти байналмилалии Интернешнл Алерт ва маблағгузории намояндагии Иттиҳоди Аврупо дар Тоҷикистон баргузор намуданд.
Дар маҳфил намояндагони Маркази тадқиқоти стратегии назди Президенти ҶТ, Вазорати рушди иқтисод ва савдои ҶТ, роҳбарони ВАО-и давлатӣ ва мустақил, рӯзноманигорон, таҳлилгарон ва коршиносони соҳаи иқтисод иштирок намуданд.
Иштирокдорон кам будани рӯзноманигоронеро, ки дар соҳаи иқтисод мақола нависанд, хотиррасон намуда, дар оянда дар факултаи журналистика ташкил кардани шуъбаи журналистикаи иқтисодӣ ё чунин як ихтисосро барои рушди журналистикаи иқтисодӣ дар кишвар кори хуб арзёбӣ намуданд.
Инчунин зикр гардид, ки дар ҳолати пешниҳод накардани баъзе санадҳои расмӣ аз ҷониби вазорату идораҳо барои журналистон истифодаи далелҳои иқтисодӣ ва фарҳангию сиёсӣ аз сомонаҳои расмии онҳо беҳтар аст.
Ёдоваор мешавем, ки аввалин вохӯрӣ дар доираи маҳфили журналистикаи иқтисодӣ «Тавозун» барпо гардид.