«Китоб ва мусиқӣ барои кӯдакону наврасони Тоҷикистон» -фестивали ҷумҳуриявӣ

Душанбе, 16.02.2016 (АМИТ «Ховар»).-Бо ибтикори Вазорати фарҳанги Ҷумҳурии Тоҷикистон ва Муассисаи давлатии «Китобхонаи давлатии бачагонаи ҷумхуриявии ба номи Мирсаид Миршакар» дар ҳамкорӣ бо Вазорати маориф ва илми Ҷумҳурии Тоҷикистон, Кумитаи телевизион ва радиои назди Ҳукумати Ҷумҳурии Тоҷикистон, Иттифоқи нависандагон ва Иттифоқи композиторони Тоҷикистон, мақомоти иҷроияи ҳокимияти давлатии вилоятҳо ва шаҳру ноҳияҳои кишвар Фестивали ҷумҳуриявии «Китоб ва мусиқӣ барои кӯдакону наврасони Тоҷикистон»  ҷараён дорад.

Рӯзи 13 феврали соли 2016 дар шаҳри Кӯлоби вилояти Хатлон бо иштироки кормандони масъули Вазорати фарҳанги Ҷумҳурии Тоҷикистон, мақомоти иҷроияи ҳокимияти давлатии шаҳр, омӯзгорону хонандагони муассисаҳои таҳсилоти миёнаи умумӣ ва мактабҳои бачагонаи мусиқӣ, санъат ва рассомии шаҳри Кӯлоб даври навбатии Фестивали ҷумҳуриявии «Китоб ва мусиқӣ барои кӯдакону наврасони Тоҷикистон» баргузор гардид. Дар фестивал намоиши китобҳо, хулосаи библиографӣ, намоиши дастранҷи кӯдакону наврасон, мулоқот бо адибон ва композиторон доир гардида, озмунҳои гуногун, аз қабили «Синфи китобдӯст», «Навоҳои дилангези кӯдакона», «Ромишгарони наврас», «Хонандаи фаъол» баргузор гардиданд. Ба  ғолибон ҷоизаҳои фестивал «Барои қироати беҳтарин», «Барои беҳтарин намоиши китоб», «Барои беҳтарин оҳанг», «Барои тарғиби фаъолонаи Фестивал», «Ромишгари ҷавон», «Мутриби ҷавон» супорида шуданд.

Мақсади фестивал тарғиб ва оммавигардонии хониш дар байни кӯдакону наврасон, ҷалби бештари онҳо ба китобхона, ташаккули малакаҳои мутолиаи китоб, тарбия намудани ҳисси зебоипарастӣ дар замири наврасон, ифтихори миллӣ, ватандӯстӣ, гиромидошти арзишҳои милливу умумибашарӣ ва мусоидат ба дарки неруи бузурги китобу мусиқӣ дар тараннуми ҳаёти насли наврас мебошад.