Мардуми Нижний Новгород бо «Шоҳнома»-и Фирдавсӣ шинос шуданд

Душанбе, 18.02.2016 (АМИТ «Ховар») — Дар шаҳри Кстовои вилояти Нижний Новгород ҷаласаи адабӣ-мусиқавӣ бахшида ба шеъри давлатҳои форсзабон ва Русия баргузор гардид.
Ба гуфтаи раиси «Анҷумани мардуми эронизабон» Эраҷ Бобоев, мақсади баргузории ҷаласа шинос намудани аҳолии Нижний Новгород, пеш аз ҳама, ҷавонони дорои истеъдодҳои мухталиф, ки ганҷи фарҳанги ҷаҳониро ташкил медиҳанд, мебошад.
Дар чорабинӣ донишҷӯёни рус, тоҷик, эронии дар донишгоҳҳои вилояти Нижний Новгород таҳсилкунанда, намояндагони ҷамъияти тоҷикони ноҳияи Кстово ва инчунин намояндагони иттиҳодияҳои гуногуни миллӣ-фарҳангии вилояти Нижний Новгород иштирок намуданд.
Иштирокдорони ҷаласа шеърҳои классикони тоҷику форс, аз ҷумла порчаҳо аз «Шоҳнома»-и Абулқосим Фирдавсиро бо забонҳои гуногун қироат намуданд. Дар назди меҳмонон намояндагони ҷамъияти тоҷикон Музаффар Абдулвоҳидов ва Раҳимҷон Раҷабов бо асбобҳои мусиқии миллии тоҷикӣ- дутору таблак ҳунарнамоӣ карданд.
Ҷаласа аз ҷониби Маркази нависандагони ба номи П. Штатнова ва ташкилоти минтақавии «Анҷумани мардуми эронизабон» -и Нижний Новогород ташкил карда шуд.