«Масъалаи омода намудани мутахассисони забондон дар 4 сол бояд ҳал шавад» — бардошт аз Паём

Хуҷанд, 11.02.2016 (АМИТ  «Ховар»).-Дар машварати кории назди сардори Раёсати маорифи вилояти Суғд масъалаҳои муҳими рӯз, аз ҷумла баланд бардоштани сифати машғулиятҳои курсҳои такмили ихтисос ва бозомӯзии омӯзгорони фанҳои забони давлатӣ, забони русӣ ва забони хориҷӣ мавриди баррасӣ қарор гирифт.

Дар ин замина сардори Раёсати маорифи вилоят Осим Каримзода махсус ба масъалаи баланд бардоштани сатҳу сифати таълими забонҳои модарӣ, русӣ ва англисӣ дар муассисаҳои соҳа таваҷҷуҳ зоҳир намуда, иброз дошт, ки ин амал аз Паёми имсолаи Сарвари давлат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон сарчашма мегирад, аз ин рӯ ба ин масъала диққати ҷиддӣ бояд зоҳир шавад. Вобаста ба ин масъала роҳбарони як зумра  вазорату  идораҳои масъул вазифадор шуданд, ки дар давоми 4 соли оянда масъалаи бо омӯзгорони фанҳои забони русӣ ва англисӣ  пурра таъмин намудани муассисаҳои таҳсилоти умумиро ҳал намоянд.