Мулоқоти М. Муинӣ бо муҳассилин ва устодон

Душанбе, 16.02.2016 (АМИТ «Ховар»).-Чанде пеш вохӯрии муовини якуми раиси Кумитаи ҷавонон, варзиш ва сайёҳӣ Мавсума Муинӣ бо муҳассилин ва устодони Коллеҷи тарбияи ҷисмонии Тоҷикистон ва Мактаб-интернати таҳсилоти умумии ҷумҳуриявии тамоюли варзишӣ ба номи И. Ҳасанов оид ба муҳтавои тағйиру иловаҳо ба Конститутсияи (Сарқонуни) Ҷумҳурии Тоҷикистон, иштироки фаъолонаи аҳолӣ дар раъйпурсии умумихалқӣ, ки 22 майи соли равон доир мегардад, баргузор шуд.

Дар мулоқот масъули кумита доир ба тағйирот ба Конститутсия гуфт, ки ин тағйирот барои рушди ҳаёти иҷтимоиву иқтисодӣ, баланд бардоштани маънавиёти аҳолӣ ва тарбияи насли наврас мусоидат менамоянд

Дар вохӯрӣ муовини якуми раиси кумита Мавсума Муинӣ ҳамчунин оид ба самтҳои дар Паёми имсолаи Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ сухан гуфта, нақши ҷавононро дар татбиқи ҳадафҳои созандаю бунёдкоронаи Пешвои миллат муҳим арзёбӣ намуд.

Зикр шуд, ки бовару эътимоди Пешвои миллат нисбат ба ҷавонон масъулияти насли ҷавонро дучанд гардонида, дар навбати худ онҳоро муваззаф мегардонад, ки бо баҳои хубу аъло хонда, соҳиби ихтисос гарданд.