Мулоқоти раиси Кумитаи ҷавонон, варзиш ва сайёҳӣ бо донишҷӯёни ДСРТ

Душанбе, 13.02.2016 (АМИТ «Ховар»).-. Чанде пеш мулоқоти раиси Кумитаи ҷавонон, варзиш ва сайёҳии ҶТ Аҳтам Абдуллозода бо донишҷӯёни Донишгоҳи (славянии) Тоҷикистону Русия (ДСРТ) доир гардид. Дар мулоқот Аҳтам Абдуллозода вобаста ба Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон Эмомалӣ Раҳмон ба Маҷлиси Олӣ сухан гуфта, онро ҳамчун ҳуҷҷати муҳим арзёбӣ ва ҳар як банду муҳтавои онро ба донишҷӯён маънидод кард.
Ҳамчунин оид ба вазъи сиёсию иқтисодии ҷомеаи ҷаҳонӣ ёдовар шуда, таъсири бевоситаи он ба ҳама самтҳои кишоварзӣ, аз ҷумла пастшавии қурби асъори миллӣ, ки ҳамаи ин дар маҷмӯъ таъсири манфӣ ба самтҳои рӯзмарра расонида истодааст, шарҳ дода шуд.
Вобаста ба ҷаҳонишавӣ ва таъсири мушкилоти ба вуҷудомадаи давлтаҳои Ховари Миёна ба ҳаёти ҷавонон ва волидони онҳо, ки бо истифода аз паст будани сатҳи маърифатнокӣ баъзе аз ҷавонон тавассути сомонаҳои иҷтимоӣ ба гурӯҳҳои ифротгаро ҷалб гардида, ҳаёт, қадр, обрӯи худ ва наздиконашонро зери хатар гузошта истодаанд, сухан гуфта шуд.
Дар мулоқот пешниҳод гардидани тағйироту иловаҳо ба Конститутсияи Ҷумҳурии Тоҷикистон аз ҷониби вакилони Маҷлиси намояндагони Маҷлиси Олии Ҷумҳурии Тоҷикистон саривақтӣ арзёбӣ гардида, нақши он барои донишҷӯёну устодон шарҳ дода шуд.