Ҷоми чемпионҳои Аврупо: Бохти “Зенит” ва “Челсӣ”

Душанбе, 17.02.2016 (АМИТ «Ховар»). -Дирӯз бозиҳои марҳалаи 1/8 ниҳоии Лигаи чемпионҳои Аврупо бо доир шудани ду бозӣ шурӯъ гардид. “Зенит”-и Санкт- Петербург дар сафар бо “Бенфика”-и Португалия дар варзишгоҳи “Эштадиу да Луж” вохӯрда, то дақиқаи 90-ум натиҷаи мусовиро нигоҳ дошт ва дар аввалин сонияҳои вақти иловашуда баъди зарбаи Жонас тӯбро аз дарвозааш гирифт ва ба мағлубият рӯ ба рӯ шуд. Ин натиҷа барои “Зенит” барои ба даври дигар гузаштан хатарнок нест.
Дар бозии дигари рӯз ПСЖ-и Фаронса бар “Челсӣ”-и Англия бо натиҷаи 2 бар 1 пирӯз шуд. Голҳоро аз дастаи ПСЖ Златан Иброҳимович дар дақиқаи 39 ва Каванӣ дар дақиқаи 89-ум ба нишон расониданд. Аз дастаи “Челсӣ” Микел дар поёни қисми якум муаллифи голи меҳмонон гардид.
Бозиҳои ҷавобии ин дастаҳо рӯзи 9-уми март барпо хоҳад шуд. Имрӯз дастаҳои “Рома”-и Италия бо “Реал”-и Испания ва “Гент”-и Белгия бо “Волсфбург”-и Олмон вориди майдон мешаванд.