Ҷоми ФФТ: Чорумин ғалабаи “Регар ТадАЗ”

Душанбе, 17.02.2016 (АМИТ «Ховар»).- Дар варзишгоҳи марказии пойтахт даври 4-уми мусобиқаи футболбозон барои Ҷоми Федератсияи футболи мамлакат идома дорад. Дирӯз дастаи “Регар ТадАЗ” дар бозии нобаробар намояндаи Лигаи якуми чемпионати мамлакат “Локомотив”-и Душанберо бо натиҷаи 10 бар 0 мағлуб кард. Ин ғалабаи чоруми пайдарпаи футболбозони шаҳри Турсунзода дар ин силсилабозиҳо мебошад.
Тими “Истиқлол”- Душанбе, ки бо ҳайати ҷавононаш дар рақобатҳо иштирок дорад, вохӯрии навбатиашро бо дастаи “Хайр”-и Ваҳдат бо ҳисоби мусовии 2 бар 2 ҷамъбаст кард.
Дар ҷадвали мусобиқоти минтақаи Душанбе “Регар ТадАЗ”бо 12 имтиёз пешсаф аст. КМВА “Помир” баъди се бозӣ бо 9 имтиёз дар мақоми дуввум ҷойгир шудааст ва имрӯз дар даври чорум бо “Помир”-и Лигаи якум ба майдон меояд. Инчунин дар ин рӯз “Кӯктош” бо “Барқи тоҷик” қувва хоҳанд озмуд.