Риояи қоидаҳои имлои забони тоҷикӣ дар Вазорати рушди иқтисод ва савдо

Душанбе, 26.02.2016. (АМИТ «Ховар»).-«Дар замони муосир ҳар як халқу миллат барои нигоҳ доштани расму оин ва таъриху фарҳанги ғании худ аз раванди ҷаҳонишавӣ, ки метавонад ба арзишҳои миллӣ таъсир расонад, кӯшиш менамояд. Яке аз арзишҳои бузурги инсонӣ, ки метавонад дар ин раванд таъсири манфиро қабул намояд, забон мебошад»,- зикр гардид дар ҷамъомаде, ки имрӯз дар Вазорати рушди иқтисод ва савдо баргузор гардид.
Дар ҷамъомад, ки бо иштироки васеи кормандон ва устоди Донишгоҳи миллии Тоҷикистон, номзади илмҳои филологӣ Меҳроб Ҷумъаев гузаронида шуд, ба масъалаи риояи қоидаҳои имлои забони тоҷикӣ таваҷҷуҳ зоҳир гардид.
Дар чорабинӣ зикр шуд, ки дар ҳамаи вазорату идораҳои кишвар коргузорӣ ҷиддан бо забони тоҷикӣ ба роҳ монда шудааст ва ин тақозо мекунад, ки ба хотири пешгирӣ аз хатоиҳои имлоӣ ва забонӣ, омӯзиши қоидаҳои имло дар ҳамаи сохторҳо ба таври дуруст ба роҳ монда шавад, зеро ин василаи асосии таъмини иҷрои Қонуни Ҷумҳурии Тоҷикистон дар бораи забони давлатӣ мебошад.
Роҷеъ ба ҷанбаҳои мухталифи риояи қоидаҳои имлои забони тоҷикӣ байни кормандон ва мутахассиси соҳа саволу ҷавоб доир шуда, барои пешрафти кор дар ин самт таклифу пешниҳодоти мушаххас ироа гардиданд.