Садамаи нақлиётии марговар

Душанбе, 15.02.2016 (АМИТ «Ховар»).-14-уми феврал ронандаи мошини тамғаи «Мерседес-Бенс», сокини 50-солаи ноҳияи Зафаробод, ҳангоми ҳаракат бо роҳи нақлиётгарди «Ғафуров-Конибодом», дар ҳудуди деҳаи Зосии ҷамоати деҳоти Исфисор аз уҳдаи идораи воситаи нақлиёт набаромада, пиёдагард, сокини 35-солаи ҳамин деҳаро пахш намудааст. Дар натиҷа пиёдагард, ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
Ҳамчунин дар ин рӯз дар хатти истгоҳи Роҳи оҳани Душанбе-Турсунзода, дар гузаргоҳи нақлиётии километри 4654-ум қатораи боркаш, таҳти идораи ронанда, сокини 59-сола ва ёрдамчии ӯ — ҷавони 25-солаи шаҳри Душанбе ба мошини тамғаи «Опел-Астра», ки ба марди 61-солаи ноҳияи Рӯдакӣ тааллуқ дорад, бархӯрдааст.
Дар натиҷа ронандаи мошини тамғаи «Опел-Астра» ва мусофири мошини мазкур сокини 59-солаи ноҳияи Рӯдакӣ ҷароҳати ҷисмонӣ бардошта, дар беморхона бистарӣ мегарданд. Марди 59-сола пас аз чанд муддат дар беморхона ба ҳалокат расидааст.