30 ҳазор сомонӣ барои озмуни «Муассисаи тиббӣ, табиб ва ҳамшираи шафқати беҳтарин»

Душанбе, 01.03.2016 (АМИТ «Ховар»).- Бо мақсади ноил шудан ба нишондиҳандаҳои беҳтарин ва ҳолати хизматрасонии муассисаҳои соҳаи тандурустӣ дар вилояти Суғд озмуни вилоятии «Муассисаи тиббӣ, табиб ва ҳамшираи шафқати беҳтарин»-и соли 2016 гузаронида мешавад.
Маросими супоридани ҷоизаҳо ба ғолибони озмуни «Муассисаи тиббӣ, табиб ва ҳамшираи шафқати беҳтарин»-и соли 2016 дар ҷамъбасти иҷрои Барномаи вилоятии «Соли 2016-соли фарди солим» моҳи ноябри соли равон сурат мегирад.
Тибқи низомномаи озмун ба Муассисаи маркази вилоятии беҳтарини сол — 30 000 сомонӣ, Беморхонаи марказии ноҳиявии (шаҳрии) беҳтарини сол 30 000 сомонӣ, Беморхонаи минтақавии беҳтарини сол — 10 000 сомонӣ, Маркази саломатии ноҳиявии (шаҳрии) беҳтарини сол 5 000 сомонӣ, Маркази саломатии деҳоти беҳтарини сол 3 000 сомонӣ, Дорухонаи беҳтарини сол 1000 сомонӣ, Беҳтарин табиби соҳаи ҷарроҳии сол 5 000 сомонӣ, Беҳтарин табиби соҳаи амрози дарунии сол 5 000 сомонӣ, Беҳтарин табиби оилавии сол 5000 сомонӣ, Беҳтарин табиби озмоишгари сол 5 000 сомонӣ ва ба беҳтарин ҳамшираи шафқати сол 1500 сомонӣ мукофотпулӣ тақдим мешавад.