4 медал аз олимпиадаи байналмилалии «Роҳи Абрешим»

Душанбе, 10.03.2016 (АМИТ «Ховар»). — Хонандагони муассисаҳои таълимии Ҷумҳурии Тоҷикистон дар олимпиадаи байналмилалии «Роҳи Абрешим» аз фанни математика дар шаҳри Алмаатои Ҷумҳурии Қазоқистон сазовори 4 медали биринҷӣ гардиданд.
Тавре ки котиби матбуотии Вазорати маориф ва илми ҶТ иттилоъ дод, бо ташаббуси Муассисаи давлатии «Маркази ҷумҳуриявии дарёфт ва рушди истеъдодҳо» дар як вақт барои хонандагони муассисаҳои таълимии ҷумҳурӣ шароити муносиб фароҳам оварда шуд, ки аз тариқи онлайн дар иҷрои шартҳои олимпиадаи мазкур зиёда аз 50 нафар иштирок варзида, натиҷаҳои назаррасро соҳиб гарданд.
Хонандагони тоҷик аз аввали соли 2016 то имрўз 48 медал ба даст овардаанд, ки аз ин 6 медал тилло, 10 медал нуқра ва 32 медал биринҷӣ мебошанд.