Ҷаласаи ёздаҳуми масъулини аршади Муколамаи «Осиёи Марказӣ ва Япония» дар Токио

Душанбе, 28.03.2016 (АМИТ «Ховар»).- 25 марти соли 2016 дар шаҳри Токио ҷаласаи ёздаҳуми масъулини аршади Муколамаи Осиёи Марказӣ ва Япония дар сатҳи муовини вазирони корҳои хориҷии Ҷумҳурии Тоҷикистон, Туркманистон, Қазоқистон, Ҷумҳурии Қирғизистон, Ҷумҳурии Узбекистон ва намояндаи махсуси Вазорати корҳои хориҷии Япония баргузор гардид.
Ҳайати Ҷумҳурии Тоҷикистонро дар ҷаласа муовини якуми вазири корҳои хориҷӣ Низомиддин Зоҳидӣ роҳбарӣ намуд.
Ҷонибҳо оид ба вазъи кунунӣ ва дурнамои ҳамкорӣ дар сатҳи бисёрҷониба, аз ҷумла дар бахшҳои амният, савдо ва сармоягузорӣ, нақлиёт ва логистика, инчунин ҳамкории фарҳангӣ ва башардӯстона изҳори назар намуданд.
Дар ҷаласа ҳамчунин корҳои омодагӣ ба ҷаласаи шашуми вазирони корҳои хориҷии кишварҳои узви Муколама, ки дар Ашқобод соли 2016 дар назар аст, баррасӣ гардиданд.
Ҳамчунин дар ҳошияи Муколама мулоқоти ҳайати Тоҷикистон бо муовини Дабири кулли девони вазирони ҳукумати Япония Ҳирошигэ Сэкова, муовини вазири парлумонии корҳои хориҷии Япония Мики Ямада баргузор гардид.