Алишер Латифзода ба узвияти Анҷумани устодони мусиқии ИМА пазируфта шуд

Душанбе, 15.03.2016. (АМИТ «Ховар»). — Ин ҳафта оҳангсози тоҷик Алишер Латифзода ба Анҷумани устодони мусиқии ИМА пазируфта шуд. Ин шинохти расмии саҳми ӯ дар парвариши мутахассисони мусиқии Амрико ва дувумин рӯйдоди фараҳбахши ҳаёташ дар се моҳи охир аст. Пештар Латифзода устоди Академияи мусиқии шаҳри Сан-Франсиско таъйин шуда буд. Ҳамватани мо дар як даҳсола тавонист бо вуҷуди душвориҳо ҷойгоҳи баланди худро дар Амрико пайдо кунад. Бисёре аз намояндагони маъруфи ҳунар ба истеъдоди ӯ арҷ мегузоранд ва бо дархости онҳо ҳукумати Амрико ба Алишер визаи махсуси эҷодкорро ҳадя намуд.
Асарҳои ӯ дар бузургтарин толорҳои консертии Амрико садо медиҳанд.