Ҳамоиши китобдорон дар шаҳри Ҳисор

Душанбе, 18.03.2016. (АМИТ «Ховар»).- Бо мақсади ба низом даровардани тартиби иҷораи китобҳои дарсӣ ва маблағҳои гардони он дар муассисаҳои таълимӣ, тақвият бахшидани соҳаи китобдорӣ, такмили дониши китобдорон, огоҳӣ аз навгониҳои соҳаи китобдорӣ 17 марти соли равон дар муассисаи таҳсилоти миёнаи умумии №1-и шаҳри Ҳисор бо мушовирони китоби шуъбаҳои маорифи шаҳру ноҳияҳо зери унвони «Мушкилоти соҳаи китобдорӣ ва роҳҳои ҳалли онҳо» машварат доир гардид.
Тавре ки аз Вазорати маориф ва илми ҷумҳурӣ хабар доданд, дар машварат муовини вазири маориф ва илм Фатҳиддин Усмонзода сухан намуда, ҳамзамон ба як гурӯҳ мушовирони китоб, ки фаъолияти хуби корӣ нишон додаанд, «Ифтихорнома» ва «Раҳматнома»-и Вазорати маориф ва илмро супорид. Дар идома иштирокдорон доир ба тартиби ҳуҷҷатнигории соҳаи иҷораи китобҳои дарсӣ, омилҳои роҳ наёфтани ҳолатҳои коррупсионӣ дар самти иҷораи китобҳои дарсӣ, роҳҳои дурусти пардохт кардани қарзи иҷораи китобҳои дарсӣ мубодилаи афкор намуданд.
Ҳамчунин дар қисмати дуюми машварат иштирокдорон аз муассисаҳои таълимии шаҳри Ҳисор ва Қалъаи Ҳисор дидан намуданд.